Mae CPD Y Bala wedi ennill y Cwpan Nathaniel MG am y tro cyntaf yn eu hanes wrth iddynt drechu Cei Connah ddydd Sadwrn.
Roedd Y Bala yn wynebu chwip o her gan wynebu tîm Cei Connah oedd heb golli mewn 21 gêm ac yn edrych i ennill eu trydydd Cwpan Nathaniel MG yn olynol.
Bu’n ornest ffyrnig ar Y Graig yng Nghefn Mawr, gyda’r ddau dîm yn gorffen y gêm gyda 10 o chwaraewyr ar y cae.
Yn hwyr yn yr hanner cyntaf, cafodd Lasanna Mendes o’r Bala gerdyn coch wedi iddo ymddangos i daflu pêl at aelod o’r dorf.
Gyda dim ond rhai munudau i fynd a’r gêm yn ddi-sgôr, aeth Cei Connah i lawr i 10 dyn wrth i’r capten George Horan gael ei anfon o’r cae.
Ni ddaeth gôl ar ôl 90 munud, na chwaith ar ôl cyfnod o amser ychwanegol, gan olygu bod yn rhaid troi at giciau o’r smotyn er mwyn penderfynu ar enillydd.
Roedd y ddau dîm yn gyfartal wedi pedwar ymgais yr un, cyn i Paul Rutherford sgorio i’r Bala i adael y sgôr yn 4-3.
Gyda’r pwysau ar ei ysgwyddau, cafodd ymgais Mike Wilde ei arbed gan y gôl geidwad Alex Ramsay gan sbarduno dathliadau mawr ymhlith chwaraewyr a chefnogwyr Y Bala.
Alex Ramsay yn arbed cic o’r smotyn Mike Wilde a’r Bala yn ennill Cwpan Nathaniel MG am y tro cyntaf yn eu hanes! 🧤🏆#NathanielMGCup pic.twitter.com/06wEG2A70w
— Sgorio ⚽️ (@sgorio) January 28, 2023
