S4C

Navigation

Wedi dau ohiriad yn ystod y pythefnos diwethaf oherwydd y glaw, bydd Y Fflint yn croesi bysedd y gall eu gêm yn erbyn Caernarfon fynd yn ei blaen ar Gae-y-Castell nos Fawrth. 

 

Nos Fawrth, 21 Rhagfyr 

Y Fflint (3ydd) v Caernarfon (7fed) | Nos Fawrth – 19:45 

Roedd hi’n ganlyniad siomedig i’r Fflint dros penwythnos wrth iddyn nhw syrthio o’r 2il safle am y tro cyntaf ers mis Hydref yn dilyn colled o 2-0 yn erbyn Y Drenewydd. 

Bydd y Cofis hefyd wedi teimlo’n rhwystredig ar ôl gorfod rhannu’r pwyntiau gydag Aberystwyth (3-3) ac hynny ar ôl bod ar y blaen o 2-0 wedi 20 munud. 

Wrth edrych yn ôl dros y tymhorau diwethaf, 32 pwynt ydi’r cyfanswm cyfartalog sydd wedi bod ei angen i sicrhau lle yn y Chwech Uchaf ar yr hollt. 

Fe allai’r Fflint gyrraedd y targed hollbwysig hwnnw o 32 pwynt pe bae nhw’n curo Caernarfon nos Fawrth. 

Ond dyw’r Fflint heb ennill gêm gartref yn erbyn Caernarfon ers 2009 gyda’r Cofis yn ennill ar eu pum hymweliad diwethaf a Chae-y-Castell. 

Mae cyn-flaenwr Caernarfon, Jack Kenny wedi sgorio 11 gôl gynghrair yn barod i’r Fflint y tymor hwn tra bod ei bartner Michael Wilde wedi rhwydo 12 gôl – yr unig dîm sydd â dau chwaraewr wedi cyrraedd ffigyrau dwbl. 

Byddai buddugoliaeth i’r Cofis yn eu gadael dim ond un pwynt y tu ôl i’r Bala (6ed) cyn y ddwy gêm fawr rhwng y ddau dîm dros gyfnod y Nadolig. 

Record cynghrair diweddar:

Y Fflint: ✅➖❌✅❌ 

Caernarfon: ✅❌✅❌➖ 

 

Bydd uchafbwyntiau’r gêm ar gael ar wefannau cymdeithasol Sgorio. 

Rhys Llwyd

Awdur Rhys Llwyd

Mwy gan Rhys Llwyd
Methu dod o hyd i'r hyn oeddech chi'n chwilio amdano?