Er bod Cwpan Cymru yn cymeryd y prif sylw y penwythnos yma, mi fydd yna un gêm gynghrair yn cael ei chwarae brynhawn Sadwrn, ac fe alla’i fod yn gêm arwyddocaol yn y ras i gyrraedd y Chwech Uchaf.
Dydd Sadwrn, 19 Chwefror
Y Drenewydd (3ydd) v Met Caerdydd (8fed) | Dydd Sadwrn – 14:30
Wythnos ar ôl i Ryan Sears sgorio wedi 95 munud i sicrhau pwynt i’r Drenewydd yn erbyn Met Caerdydd a selio lle’r Robiniaid yn y Chwech Uchaf, bydd y clybiau’n cyfarfod eto ddydd Sadwrn mewn gêm all ddiffinio tymor y myfyrwyr.
Yn fathemategol, fe all Met Caerdydd dal gyrraedd y Chwech Uchaf, er bod hynny’n bur anhebygol, ond gobaith mawr y myfyrwyr yw bod Cei Connah (6ed) yn colli eu hapêl yn erbyn y gynghrair ac yn colli pwyntiau am chwarae chwaraewr anghymwys, fyddai’n agor y drws i’r clwb yn y 7fed safle.
Byddai buddugoliaeth i Met Caerdydd ddydd Sadwrn yn eu gadael yn hafal ar bwyntiau gyda Chaernarfon yn y 7fed safle gyda dim ond un gêm i’w chwarae cyn yr hollt.
Ar ôl colli pedair gêm gynghrair yn olynol ym mis Tachwedd, bellach mae Met Caerdydd ar rediad o chwe gêm gynghrair heb golli.
Wedi dechrau arbennig i’r tymor dyw pethau heb fynd cystal i’r Drenewydd ers y toriad dros y Nadolig gyda’r Robiniaid yn methu ag ennill dim un o’u tair gêm ddiwethaf.
Record cynghrair diweddar:
Y Drenewydd: ✅✅➖❌➖
Met Caerdydd: ➖͏➖✅➖➖
Bydd uchafbwyntiau ar gael ar wefannau cymdeithasol Sgorio.
