Dros y penwythnos bydd 32 o glybiau yn cystadlu yn nhrydedd rownd Cwpan Cymru JD.
Bydd naw o glybiau’r uwch gynghrair yn cymryd rhan, yn ogystal â 14 o dimau’r ail haen, saith o’r drydedd haen, Port Talbot o’r bedwaredd haen, a’r clwb isaf ar ôl yn y gystadleuaeth, sef Glynnedd o’r bumed haen.
Nos Wener, 21 Tachwedd
Cambrian United (2) v Pen-y-bont (1)
Llandudno (2) v Cei Connah (1)
Llanelli (1) v Y Barri (1)
Met Caerdydd (1) v Y Seintiau Newydd (1)
Dydd Sadwrn, 22 Tachwedd
Bangor 1876 (3) v Treffynnon (2)
Caerfyrddin (2) v Bae Colwyn (1)
Caernarfon (1) v Penrhyncoch (2)
Dolgellau (3) v Caerau Trelai (2)
Draconiaid Caerdydd (2) v Trefelin (2)
Glynnedd (5) v Bae Trearddur (3)
Penrhiwceibr (3) v Gresffordd (2)
Porthmadog (3) v Port Talbot (4)
Sêr Treowen (2) v Pontypridd (2)
Y Rhyl 1879 (2) v Cwmbrân (3)
Y Fflint (1) v Airbus UK (2)
Dydd Sul, 23 Tachwedd
Dinas Casnewydd (2) v Blaenafon (3)
Bydd y cyffro’n cychwyn nos Wener pan fydd deiliaid Cwpan Cymru JD, Y Seintiau Newydd yn ceisio gyrru Met Caerdydd allan o’r gystadleuaeth am y trydydd tymor yn olynol.
Enillodd Met Caerdydd o 3-2 oddi cartref yn erbyn y Seintiau yn gynharach y mis hwn mewn gêm gynghrair, ond bydd Craig Harrison yn benderfynol o ddîal ar y myfyrwyr nos Wener.
Yn yr unig ornest arall rhwng dau o dimau’r uwch gynghrair bydd y tîm sydd ar waelod y tabl, Llanelli yn croesawu’r Barri i Barc Stebonheath – dau glwb sydd wedi cael eu dwylo ar y cwpan yn ystod y ganrif hon.
Mae Cei Connah wedi codi’r cwpan ddwywaith yn y 10 mlynedd diwethaf, ac mi fyddan nhw’n gobeithio osgoi sioc oddi cartref yn erbyn un o glybiau cryfaf yr ail haen, Llandudno.
Llwyddodd Pen-y-bont i gyrraedd y rownd derfynol yn 2021/22 cyn colli’n erbyn y Seintiau, a bydd tîm Rhys Griffiths yn awyddus i fynd gam ymhellach eleni, ond bydd rhaid iddynt hwythau guro gwrthwynebwyr cadarn o’r ail haen nos Wener, sef Cambrian United.
Cododd Bangor y gwpan deirgwaith yn olynol rhwng 2008 a 2010, a bydd y clwb dan ei newydd-wedd yn wynebu her anodd yn erbyn Treffynnon brynhawn Sadwrn.
Bydd enillwyr 2006/07, Caerfyrddin yn croesawu Bae Colwyn i Barc Waun Dew wrth i’r clybiau gyfarfod am y tro cyntaf erioed, ac hynny yn fyw ar S4C.
Mewn gêm ddarbi yn Sir y Fflint bydd Airbus UK yn gwneud y daith fer i Gae y Castell i herio’r Fflint, tra bydd Caernarfon yn croesawu Penrhyncoch i Barc Maesdu.
Y Rhyl oedd enillwyr y gystadleuaeth yn 2005/06, a bydd y Lilisgwynion yn croesawu Cwmbrân i’r Belle Vue brynhawn Sadwrn, clwb sydd wedi cyrraedd y rownd derfynol ar dri achlysur, ond sydd erioed wedi codi’r tlws.
Llwyddodd Port Talbot i guro’u cymodgion, Lido Afan yn y rownd ddiwethaf, a’r wobr i’r Gwŷr Dur yw taith bell i Borthmadog brynhawn Sadwrn.
Glynnedd yw’r tîm isaf ar ôl yn y gystadleuaeth, ac mi fydd y clwb o’r bumed haen yn herio Bae Trearddur, sydd ddwy gynghrair uwch eu pennau.
