Wrecsam v Caerdydd | Dydd Sul – 17:25 (Rodney Parade, Casnewydd)
Brynhawn Sul, bydd Clwb Pêl-droed Caerdydd yn gobeithio cipio tlws Cwpan Cymru Bute Energy am y trydydd tro yn olynol.
Fe lwyddodd yr Adar Gleision i godi’r gwpan yn Merthyr Tydfil tymor diwethaf ar ôl curo Llansawel 4-0.
Ennill yn erbyn Met Caerdydd o 2-0 yn 2022 oedd eu llwyddiant blaenorol yn y gystadleuaeth, a chyn hynny doedd Caerdydd heb gipio’r gwpan ers 2016, sef y tro cyntaf i’r clwb ei hennill.
Caerdydd ydy pencampwyr yr Adran Genero unwaith eto eleni, gyda’r clwb hefyd yn cipio Tlws Yr Adran ar ôl curo Abertawe 5-1 yn y rownd derfynol.
Fe enillodd Caerdydd y gynghrair am y tro cyntaf mewn 10 mlynedd y tymor diwethaf, ac fe lwyddodd y clwb godi Cwpan Cymru hefyd, ond methu allan ar dlws yr Adran oedd eu hanes ar ôl colli 3-1 yn erbyn Met Caerdydd yn y rownd derfynol. Fydd rheolwr Caerdydd, Iain Darbyshire yn benderfynol o fynd un cam ymhellach y tymor hwn er mwyn cwblhau’r trebl.
Dim ond un clwb sydd wedi llwyddo i drechu Caerdydd yn y gynghrair eleni, sef Abertawe. Fe lwyddodd yr Elyrch guro’r Adar Gleision o ddwy gôl i ddim yn y Brifddinas ddechrau mis Chwefror, ac wedyn unwaith eto ar dir cartrefol ddiwedd mis Mawrth.
Gêm ddi-sgôr yn erbyn Aberystwyth ym mis Medi yw’r unig dro arall i Gaerdydd beidio ag ennill gêm gynghrair y tymor hwn.
Wrecsam sy’n anelu i fod yn bencampwyr Cwpan Cymru Bute Energy am y tro cyntaf yn eu hanes.
Dim ond unwaith o’r blaen mae Wrecsam wedi cyrraedd y rownd derfynol, a hynny yn erbyn clwb arall o Gaerdydd, sef ‘Cardiff City Ladies’, ac er y tebygrwydd yn yr enwau maen nhw’n glwb sydd gwbl arwahan i’w gwrthwynebwyr eleni, sef ‘Cardiff City Women’. Colli o 9-0 oedd tynged Wrecsam yn y gêm honno.
Yn ystod tymor 2015-2016 fe dynnodd Wrecsam allan o’r Adran Genero ar ôl methu denu chwaraewyr.
Ar ôl dychwelyd i’r Adran Genero eleni mae Wrecsam wedi llwyddo i orffen yn drydydd, tu ôl i Gaerdydd ac Abertawe, sef yr unig glybiau i guro’r cochion y tymor hwn.
Dyw Wrecsam heb gael llawer o lwc yn erbyn yr Adar Gleision, wrth golli 5 gêm yn olynol ymhob cystadleuaeth. Fyse buddugoliaeth i Wrecsam Nos Sul yn eu gweld yn curo Caerdydd am y tro cyntaf yn eu hanes.
Ymosodwraig Caerdydd Eliza Collie sgoriodd y fwyaf o goliau yn yr Adran Genero y tymor hwn gyda 17 gôl, ond doedd Prif sgorwraig Wrecsam, Rosie Hughes ddim yn bell tu ôl iddi gyda 15 gôl ar draws y tymor.
Allan o’r 15 chwaraewraig sydd wedi sgorio 5 gôl neu fwy yn y Brif Adran y tymor hwn, mae pump ohonynt yn chwarae i Gaerdydd, gyda 21 chwaraewraig gwahanol yn sgorio i’r Adar Gleision ym mhob cystadleuaeth yn ystod y tymor.
Fe benderfynodd Wrecsam, Caerdydd ag Abertawe gynnig cytundebau lled-broffesiynol i’w chwaraewyr y tymor hwn, gyda Wrecsam yn cynnig cytundebau i 10 chwaraewr, a Chaerdydd yn cynnig cytundebau i’r holl garfan.
Rownd Gynderfynol: Caerdydd 3-1 Abertawe, Wrecsam 1-0 YSN
Rownd Yr Wyth Olaf: Wrecsam 2-0 Llansawel, Pontypridd 0-3 Caerdydd
2il Rownd: Wrecsam 1-0 Llandudno, Caerdydd 5-0 Prifysgol Abertawe
Rownd 1af: Pwllheli 0-13 Wrecsam, Llanelli 0-14 Caerdydd
