Pedair rownd gemau sydd ar ôl yn nhymor y Cymru Premier JD, ac mae’r frwydr am safleoedd yn y gemau ail gyfle yn poethi.
Mae’r Seintiau Newydd wedi sicrhau eu pumed pencampwriaeth yn olynol, ac mae Cei Connah wedi hawlio’r ail safle, ac felly bydd y ddau glwb yn cynrychioli Cymru yn Ewrop dros yr haf.
Fis nesaf, bydd Caernarfon a’r Fflint yn cystadlu am y trydydd tocyn i Ewrop, ac hynny yn rownd derfynol Cwpan Cymru JD, ac yna bydd y pedwerydd safle Ewropeaidd yn mynd i enillwyr y gemau ail gyfle.
I lawr yn y Chwech Isaf a dim ond pwynt sy’n gwahanu Hwlffordd a Llansawel yn y ras am y 7fed safle, tra bod angen buddugoliaeth ar Y Bala os am geisio dringo allan o safleoedd y cwymp.
CHWECH UCHAF
Y Seintiau Newydd (1af) v Bae Colwyn (3ydd) | Nos Wener – 19:45
Mae’r Seintiau Newydd wedi sicrhau pencampwriaeth y Cymru Premier JD am y 18fed tro yn eu hanes, ac am y pumed tymor yn olynol.
Ond er y llwyddiant yn y gynghrair, mae’n bosib y bydd eleni’n cael ei gyfri fel tymor siomedig i’r Seintiau gan mae dim ond un tlws fydd yn mynd i Groesoswallt, a’u bod wedi cyflawni o leiaf dwbl domestig mewn 10 o’u 12 tymor blaenorol.
Er hynny, mae criw Craig Harrison wedi ennill wyth gêm gynghrair yn olynol ac yn benderfynol o orffen y tymor yn gryf.
Mae Bae Colwyn wedi codi i’r trydydd safle ar ôl buddugoliaeth dda yn erbyn Y Barri, gyda cyn-chwaraewr y Seintiau, Aeron Edwards yn serennu yng nghanol cae.
Dyw Bae Colwyn erioed wedi curo’r Seintiau, ac mae prif sgoriwr y gynghrair, Jordan Williams wedi sgorio yn y dair gêm flaenorol yn erbyn y Gwylanod y tymor hwn.
Record cynghrair diweddar:
Y Seintiau Newydd: ✅✅✅✅✅
Bae Colwyn: ͏✅❌✅❌✅
Y Barri (6ed) v Caernarfon (5ed) | Dydd Sadwrn – 14:30
Mae’r Barri a Chaernarfon yn hafal ar bwyntiau ar waelod y Chwech Uchaf, gyda record y ddau glwb yr un fath (ennill 10, cyfartal 9, colli 9).
Ac mae’r record benben wedi bod yn hafal eleni hefyd gyda Caernarfon yn ennill unwaith, Y Barri’n ennill unwaith, a’r ornest arall yn gorffen yn gyfartal.
Y trydydd safle yw’r nod i’r ddau dîm yma, ond ar ôl ennill dim ond un o’u saith gêm gynghrair yn 2026 bydd angen i’r Cofis godi’r safon.
Roedd Y Barri wedi ennill pedair gêm yn olynol, ac hynny heb ildio gôl cyn eu colled ym Mae Colwyn ddydd Sadwrn diwethaf.
Bydd Y Barri’n gobeithio ennill y gemau ail gyfle er mwyn chwarae’n Ewrop am y tro cyntaf ers chwe mlynedd, tra bydd Caernarfon yn ysu i osgoi’r gemau ail gyfle drwy ennill Cwpan Cymru.
Record cynghrair diweddar:
Y Barri: ❌✅✅✅❌
Caernarfon: ͏➖❌❌✅❌
Cei Connah (2il) v Pen-y-bont (3ydd) | Dydd Sadwrn – 14:30
Yn nhymor cyntaf John Disney wrth y llyw, mae Cei Connah wedi sicrhau’r ail safle gan gadarnhau eu lle yn Ewrop ar gyfer y tymor nesaf.
Mae’r Nomadiaid wedi chwarae’n gyson ar y llwyfan Ewropeaidd yn y degawd diwethaf, ond ar ôl tymor o seibiant ar ôl gorffen yn 8fed llynedd, bydd selogion Cei Connah yn paratoi am antur arall yn Ewrop eleni.
Cei Connah wedi cryfhau’n sylweddol felly, ond mae Pen-y-bont yn mynd i’r cyfeiriad arall gyda’r Gleision wedi ennill dim ond un o’u 12 gêm ddiwethaf (vs Llanelli).
Dyw Pen-y-bont heb guro clwb o’r Chwech Uchaf ers mis Medi (vs Bae Colwyn), ac ar ôl colli yn erbyn YSN ddydd Sadwrn mae tîm Rhys Griffiths wedi syrthio o’r tri uchaf am y tro cyntaf ers mis Awst.
Mae Cei Connah wedi cadw tair llechen lân yn erbyn Pen-y-bont y tymor hwn, gan ennill y ddwy ornest yn rhan gynta’r tymor cyn y gêm ddi-sgôr yn Stadiwm Dragonbet fis diwethaf.
Record cynghrair diweddar:
Cei Connah: ➖➖❌❌✅
Pen-y-bont: ❌➖❌❌❌
CHWECH ISAF
Llanelli (12fed) v Met Caerdydd (10fed) | Nos Wener – 19:45
Gyda dim ond dwy fuddugoliaeth mewn 28 gêm gynghrair, a dim ond 10 pwynt ar y bwrdd, mae hi wedi bod yn ymgyrch eithriadol o siomedig i Lanelli sydd yn sicr o syrthio ar ddiwedd y tymor.
Mae Met Caerdydd mewn safle peryglus, pum pwynt uwchben safleoedd y cwymp ar ôl rhediad truenus o 11 gêm heb fuddugoliaeth (cyfartal 6, colli 5).
Ers curo’r Seintiau Newydd ddwywaith ym mis Tachwedd, dyw Met Caerdydd m’ond wedi ennill unwaith mewn 13 gêm (vs Llanelli).
Roedd Met Caerdydd wedi ennill chwe gêm yn olynol yn erbyn Llanelli cyn yr ornest ddiwethaf rhwng y timau ym mis Chwefror ble gorffennodd hi’n 1-1 ar Gampws Cyncoed.
Record cynghrair diweddar:
Llanelli: ❌➖❌➖❌
Met Caerdydd: ➖➖➖❌❌
Llansawel (8fed) v Y Fflint (9fed) | Dydd Sadwrn – 14:30
Bydd Llansawel yn llawn hyder gan i’r Cochion golli dim ond un o’u naw gêm ddiwethaf (ennill 6, cyfartal 2), a dyw tîm Andy Dyer bellach m’ond pwynt y tu ôl i Hwlffordd yn y ras am y 7fed safle.
Mae Thomas Walters yn mwynhau tymor da i Lansawel, ac o glybiau’r Chwech Isaf does neb wedi cyfrannu at fwy o goliau nac ymosodwr y Cochion (sgorio 11, creu 9).
Y Fflint a’r Seintiau Newydd yw’r unig ddau glwb sydd heb golli gêm gynghrair ers yr hollt, ac mae tîm Lee Fowler wedi agor bwlch o saith pwynt rhyngddyn nhw a’r Bala yn safleoedd y cwymp.
Bydd Y Fflint yn dal i anelu am y 7fed safle, ond targed mawr y Sidanwyr bydd ceisio curo Caernarfon yn rownd derfynol Cwpan Cymru er mwyn sicrhau eu lle’n Ewrop am y tro cyntaf erioed.
Mae gan Y Fflint record gryf yn erbyn Llansawel gan nad yw’r Sidanwyr wedi colli dim un o’u saith gornest yn erbyn y Cochion (ennill 4, cyfartal 3).
Record cynghrair diweddar:
Llansawel: ͏❌➖✅✅✅
Y Fflint: ✅➖➖✅➖
Y Bala (11eg) v Hwlffordd (7fed) | Dydd Sadwrn – 17:00 (Yn fyw arlein)
Mae’r Bala wedi bod yn aelodau o’r uwch gynghrair ers 16 mlynedd, ac o’r clybiau presennol, Y Seintiau Newydd yw’r unig glwb arall sydd wedi aros yn y gynghrair yn ddi-dor ers tymor cynta’r Bala yn 2009/10.
Ond ar ôl 12 mlynedd yn y Chwech Uchaf, mae’r Bala wedi methu’r nod eleni ac mae’r clwb mewn perygl o syrthio i’r ail haen ar ôl ennill dim ond dwy o’u 19 gêm gynghrair ddiwethaf.
Dyw’r Bala m’ond wedi ennill unwaith ers mis Tachwedd, a byddai colled arall ddydd Sadwrn yn gadael Hogiau’r Llyn mewn sefyllfa anobeithiol.
Hwlffordd sy’n parhau i arwain y pac yn y Chwech Isaf ar ôl ennill pump o’u chwe gêm gynghrair ers yr hollt.
Mae Hwlffordd wedi cadw saith llechen lân yn eu naw gêm ddiwethaf, ac ar ôl ennill y gemau ail gyfle’r tymor diwethaf, bydd yr Adar Gleision yn anelu i ail-adrodd y gamp eleni.
Mae Hwlffordd eisoes wedi curo’r Bala deirgwaith y tymor hwn, a dyw tîm Tony Pennock heb golli yn eu saith gornest ddiwethaf yn erbyn Y Bala, gan gadw chwe llechen lân yn y gemau rheiny.
Mae Corey Shephard wedi sgorio tair gôl mewn tair gêm i’r Adar Gleision yn erbyn Y Bala y tymor hwn, yn cynnwys gôl ryfeddol o’r cylch canol ar Faes Tegid ym mis Rhagfyr.
Record cynghrair diweddar:
Y Bala: ➖❌❌➖➖
Hwlffordd: ✅✅✅❌✅
Bydd uchafbwyntiau’r gemau ar gael ar wefannau cymdeithasol Sgorio.
