Yn dilyn saib ar gyfer rownd wyth olaf Cwpan Cymru JD, bydd y sylw’n troi’n ôl at y gynghrair y penwythnos hwn.
Bydd Caernarfon a’r Fflint yn llawn hyder ar ôl sicrhau eu lle yn rownd gynderfynol Cwpan Cymru gyda buddugoliaethau yn erbyn Bae Colwyn a Bae Trearddur.
Dinas Bangor 1876 ac Y Rhyl 1879 yw’r ddau glwb arall sydd wedi cyrraedd y pedwar olaf, a bydd y gemau’n cael eu dethol ar gyfer y rownd gynderfynol ar nos Lun, 9 Chwefror.
Yn ôl at y gynghrair, ac mae’r Seintiau Newydd wyth pwynt yn glir ar frig y tabl gyda naw gêm ar ôl i’w chwarae.
Mae Cei Connah naw pwynt uwchben Pen-y-bont yn y ras am yr ail safle, tra bod pethau’n llawer tynnach yn y Chwech Isaf.
Pum pwynt yn unig sy’n gwahanu’r pum clwb rhwng y 7fed a’r 11eg safle, sy’n golygu y bydd y clybiau rheiny i gyd yn llygadu lle yn y gemau ail gyfle.
Ac ar waelod y domen mae pethau’n edrych yn ddu ar Lanelli sydd ond wedi cipio un pwynt o’u 13 gêm gynghrair ddiwethaf.
CHWECH UCHAF
Cei Connah (2il) v Caernarfon (4ydd) | Nos Wener – 19:45
Eleni, bydd y clwb sy’n gorffen yn 2il yn camu’n syth i Ewrop, ac mae Cei Connah yn edrych yn gyfforddus yn y safle hwnnw yn dilyn rhediad rhyfeddol o 15 gêm gynghrair heb golli (ennill 11, cyfartal 4).
Mae Caernarfon 13 o bwyntiau y tu ôl i’r Nomadiaid, ac felly canolbwyntio ar y gemau ail gyfle fydd y nod i’r Cofis, ond bydd Richard Davies yn gobeithio y gall ei garfan sicrhau lle’n Ewrop cyn hynny, drwy godi Cwpan Cymru am y tro cyntaf yn eu hanes.
Ar ôl trechu Bae Colwyn o 4-1 yn rownd yr wyth olaf, Caernarfon yw’r ffefrynnau i godi’r cwpan eleni gan mae nhw yw’r unig glwb o’r Chwech Uchaf ar ôl yn y gystadleuaeth.
Dyw Caernarfon m’ond wedi colli un o’u saith gêm ddiwethaf ym mhob cystadleuaeth (ennill 3, cyfartal 3), ac ar ôl arwyddo Adrian Cieslewicz o’r Seintiau Newydd yr wythnos yma, bydd y Cofis yn ffyddiog o orffen y tymor yn gryf.
Mae Cieslewicz yn ymuno â sawl chwaraewr arall yng ngharfan Caernarfon sydd â phrofiad o chwarae gyda’r Seintiau Newydd (Brad Young, Sion Bradley, Zack Clarke, Josh Lock, Daniel Gosset, Connor Roberts).
Dyw’r Caneris m’ond wedi colli un o’u saith gêm ddiwethaf yn erbyn Cei Connah (ennill 3, cyfartal 3), ac roedd y Nomadiaid wedi ennill wyth gêm gynghrair yn olynol cyn i Caernarfon ddod â’r rhediad hwnnw i ben fis diwethaf (Cfon 2-2 Cei).
Record cynghrair diweddar:
Cei Connah: ✅✅✅➖➖
Caernarfon: ͏➖❌✅➖➖
Y Seintiau Newydd (1af) v Pen-y-bont (3ydd) | Dydd Sadwrn – 12:30 (Arlein)
Mae’r Seintiau Newydd ar y trywydd cywir i hawlio’r bencampwriaeth am y bumed blynedd yn olynol gyda criw Craig Harrison yn eistedd wyth pwynt yn glir ar frig y tabl.
Mae’r Seintiau wedi ennill chwech o’u saith gêm ddiwethaf, a gyda rownd derfynol Cwpan Nathaniel MG i’w ddod ar ddiwedd mis Chwefror, bydd cewri Croesoswallt yn anelu i gwblhau dwbl domestig am y pumed tymor o’r bron.
Dyw Pen-y-bont yn sicr heb fod ar eu gorau yn ddiweddar, gan ennill dim ond un o’u saith gêm ddiwethaf (Llanelli 0-1 Pen-y-bont), a bydd Rhys Griffiths yn benderfynol o godi hyder ei hogiau cyn y gemau ail gyfle.
Enillodd y Seintiau eu dwy gêm yn erbyn Pen-y-bont yn rhan gynta’r tymor, a Jordan Williams oedd yr arwr yn yr ornest ddiwethaf, yn taro hatric mewn buddugoliaeth o 6-2 i’r pencampwyr yn Neuadd y Parc ym mis Hydref.
Mae’r ymosodwr 33 mlwydd oed wedi sgorio 21 o goliau cynghrair i’r Seintiau Newydd y tymor hwn, ac os bydd Williams yn parhau i danio o flaen gôl, yna fe all fod y chwaraewr cyntaf i sgorio 30 o goliau cynghrair ers i Rhys Griffiths wneud hynny yn 2009/10.
Record cynghrair diweddar:
Y Seintiau Newydd: ✅❌✅✅✅
Pen-y-bont: ➖➖✅➖➖
Y Barri (6ed) v Bae Colwyn (5ed) | Dydd Sadwrn – 14:30
Roedd hi’n benwythnos siomedig i’r Barri a Bae Colwyn gyda’r ddau glwb yn colli yn rownd wyth olaf Cwpan Cymru JD.
Bydd Y Barri’n teimlo eu bod wedi colli cyfle euraidd i gyrraedd y rownd gynderfynol yn dilyn eu colled o 2-1 yn erbyn Y Rhyl 1879 o’r ail haen.
Roedd hi’n noson rwystredig i Fae Colwyn hefyd wrth iddyn nhw golli o 4-1 oddi cartref yn erbyn Caernarfon.
Un pwynt sy’n gwahanu’r ddau glwb yn y tabl, a bydd y timau’n brwydro i orffen mor uchel a phosib er mwyn ceisio sicrhau gêm gartref yn y gemau ail gyfle.
Dyw’r ddau dîm heb fod yn tanio’n ddiweddar gyda’r Barri wedi colli pedair o’u pum gêm ddiwethaf, a Bae Colwyn heb ennill mewn pedair gêm.
Y Barri gafodd y gorau o bethau yn rhan gynta’r tymor, yn ennill o 4-1 ar Ffordd Llanelian ym mis Tachwedd yn dilyn gêm gyfartal 1-1 ar Barc Jenner ym mis Awst.
Record cynghrair diweddar:
Y Barri: ✅❌❌✅❌
Bae Colwyn: ͏❌✅❌❌➖
CHWECH ISAF
Llansawel (8fed) v Hwlffordd (9fed) | Nos Wener – 19:45
Dim ond un pwynt sy’n gwahanu Met Caerdydd, Llansawel a Hwlffordd yn y ras am y 7fed safle, ac felly mae hon yn frwydr arwyddocaol ar frig y Chwech Isaf.
Wedi dweud hynny, dyw Hwlffordd ond bedwar pwynt uwchben safleoedd y cwymp a bydd yr Adar Gleision eisiau codi’n glir o’r ddau isaf nos Wener.
Mae Llansawel yn mwynhau eu cyfnod gorau erioed yn yr uwch gynghrair ar ôl ennill tair gêm yn olynol am y tro cyntaf (vs Hwlffordd, Y Barri a Llanelli).
Dyw Llansawel m’ond wedi colli dwy o’u naw gêm ddiwethaf (vs YSN a Chei Connah), ac ar ôl gorffen yn 10fed y tymor diwethaf, bydd Andy Dyer yn gobeithio gwella ar hynny a chystadlu am y 7fed safle eleni.
Mae prif flaenwr y ddau glwb yn mwynhau tymor safonol gyda Thomas Walters a Ben Ahmun wedi cyfrannu at 15 o goliau yr un yn y gynghrair – Thomas Walters (sgorio 8, creu 7 i Lansawel), Ben Ahmun (sgorio 9, creu 6 i Hwlffordd).
Record cynghrair diweddar:
Llansawel: ͏❌➖✅✅✅
Hwlffordd: ➖✅➖❌✅
Llanelli (12fed) v Y Fflint (10fed) | Dydd Sadwrn – 14:30
Mae’r Fflint wedi llwyddo i gamu i rownd gynderfynol Cwpan Cymru am y tro cyntaf ers tymor 1953/54, ac mae’r Sidanwyr wedi gwneud hynny heb ildio unwaith yn y gystadleuaeth eleni.
Byddai codi’r cwpan am y tro cyntaf ers 72 o flynyddoedd yn gamp anhygoel i dîm Lee Fowler, ond yn y cyfamser mae gan y tîm waith i’w wneud i ddringo o waelodion y tabl.
Dim ond un pwynt sy’n gwahanu’r Fflint a safleoedd y cwymp, sy’n golygu y bydd Lee Fowler yn disgwyl dim llai na thriphwynt yn erbyn Llanelli, sef y clwb ar waelod y tabl.
Mae Llanelli 16 pwynt o dan diogelwch y 10fed safle, ac ar ôl cipio dim ond un pwynt o’u 13 gêm gynghrair ddiwethaf gan sgorio dim ond 13 gôl mewn 23 gêm, mae gan Terry Boyle dasg anferthol o’i flaen i geisio achub y Cochion.
Llanelli a’r Fflint yw’r ddau glwb sydd â’r record amddiffynnol waethaf yn y gynghrair y tymor hwn gyda’r Cochion yn ildio cyfartaledd o 2.7 gôl y gêm, a’r Sidanwyr yn ildio 2.2 gôl y gêm.
Bydd blaenwr Y Fflint, Elliott Reeves yn methu aros tan brynhawn Sadwrn gan iddo sgorio hatric yn y ddwy gêm yn erbyn Llanelli yn rhan gynta’r tymor (Lli 0-5 Ffl, Ffl 4-0 Lli).
Record cynghrair diweddar:
Llanelli: ❌❌❌❌❌
Y Fflint: ➖❌✅❌✅
Y Bala (11eg) v Met Caerdydd (7fed) | Dydd Sadwrn – 14:30
Met Caerdydd sy’n dechrau’r penwythnos ar frig y Chwech Isaf, tra bod Y Bala’n eistedd yn safleoedd y cwymp, ond pum pwynt yn unig sy’n gwahanu’r ddau glwb.
Er eu safle addawol, dyw Met Caerdydd heb ennill yn eu chwe gêm ddiwethaf, a bydd Y Bala eisiau manteisio ar y diffyg hyder yng ngharfan y myfyrwyr.
Dim ond un gôl mae Met Caerdydd wedi sgorio yn eu pedair gêm ddiwethaf, ac mae prinder sgorwyr naturiol wedi bod yn broblem i’r myfyrwyr gan nad oes neb wedi sgorio mwy na pum gôl gynghrair i dîm Ryan Jenkins y tymor hwn.
Mae’r Bala wedi bod yn aelodau o’r uwch gynghrair ers 16 mlynedd, ac o’r clybiau presennol, Y Seintiau Newydd yw’r unig glwb arall sydd wedi aros yn y gynghrair yn ddi-dor ers tymor cynta’r Bala yn 2009/10.
Ond ar ôl 12 mlynedd yn y Chwech Uchaf, mae’r Bala wedi methu’r nod eleni ac mae’r clwb mewn perygl o syrthio i’r ail haen ar ôl colli 11 o’u 15 gêm ddiwethaf.
Dyw Met Caerdydd m’ond wedi colli un o’u 13 gornest ddiwethaf yn erbyn Y Bala (ennill 6, colli 6), ond fe gafon nhw ychydig o help gan y gwynt yn gynharach yn y tymor wrth i Lassana Mendes sgorio un o goliau rhyfeddaf y tymor i’w rwyd ei hun ar Gampws Cyncoed.
Record cynghrair diweddar:
Y Bala: ❌❌❌✅❌
Met Caerdydd: ͏➖❌➖➖❌
Bydd uchafbwyntiau’r gemau ar gael ar wefannau cymdeithasol Sgorio.
