Mae’r tymor newydd wedi cyrraedd a bydd y cyfan yn dechrau nos Wener gyda darbi’r canolbarth rhwng yr unig ddau glwb sydd wedi bod yn holl bresennol ers ffurfio’r gynghrair yn 1992.
Nos Wener, 9 Awst
Y Drenewydd v Aberystwyth | Nos Wener – 19:45
Mae hi wedi bod yn haf o newidiadau mawr i’r Drenewydd wedi i’r clwb fethu â chyrraedd Ewrop ar ôl gwneud hynny am y ddau dymor blaenorol.
I gael parhau i chwarae’n Ewrop mae’r amddiffynwyr Ryan Sears a Matthew Jones wedi gadael Parc Latham am Gaernarfon, tra bod Louis Robles wedi dychwelyd i’r Bala.
Bydd Aberystwyth yn gobeithio osgoi tymor arall tua’r gwaelodion, gyda’r Gwyrdd a’r Duon yn llwyddo i ddianc rhag y cwymp ar y diwrnod olaf am yr ail flwyddyn yn olynol.
Mae’r Drenewydd ar rediad o chwe gêm heb golli yn erbyn Aberystwyth (ennill 5, cyfartal 1), ond roedd y gemau’n rhai agos rhwng y clybiau’r tymor diwethaf gyda gêm ddi-sgôr ar Barc Latham ym mis Awst, cyn i Matthew Jones sgorio unig gôl y gêm i’r Robiniaid yng Nghoedlan y Parc ym mis Tachwedd.
Bydd Scott Ruscoe’n gobeithio gall ei dîm ymateb yn syth ar ôl colli ar giciau o’r smotyn yn erbyn Caernarfon yng Nghwpan Nathaniel MG y penwythnos diwethaf, tra bod Aberystwyth ymlaen i’r rownd nesaf yn dilyn buddugoliaeth o 2-0 ym Mae Colwyn.
Dydd Sadwrn, 10 Awst
Y Barri v Y Bala | Dydd Sadwrn – 14:30
Mae’r Barri wedi bod yn brysur dros yr haf yn cryfhau’r garfan gyda’r ychwanegiad diweddaraf, Robbie Willmott yn un fydd yn sicr yn cyffroi selogion Parc Jenner.
Chwaraoedd Willmott bron i 300 o gemau i Gasnewydd dros gyfnod o naw tymor a bydd ei brofiad yn allweddol os yw’r Barri am geisio cystadlu am le yn y Chwech Uchaf eleni.
Roedd yna dorcalon i’r Bala’n Ewrop dros yr haf gyda’r clwb yn colli yn yr amser ychwanegol yn erbyn Paide Linnameeskond o Estonia yn rownd ragbrofol gyntaf Cyngres UEFA.
Gorffennodd Y Bala’n drydydd y tymor diwethaf a dyna fydd y targed unwaith yn rhagor i dîm Colin Caton, a gyda Louis Robles a Lassana Mendes wedi dychwelyd i’r linell ymosodol bydd disgwyl i’r Bala fod yn fygythiad ym mhen ucha’r tabl.
Roedd Y Barri ychydig yn lwcus i drechu Llanelli ar giciau o’r smotyn yng Nghwpan Nathaniel MG y penwythnos diwethaf, ac mae’r Bala wedi camu ymlaen hefyd ar ôl gêm agos yn erbyn Rhuthun gyda’r gŵr ifanc 17 oed, Thomas Hughes yn sgorio unig gôl y gêm i Hogiau’r Llyn.
Y Fflint v Met Caerdydd | Dydd Sadwrn – 14:30
Mae’r Fflint wedi esgyn yn syth yn ôl i’r Cymru Premier JD ar ôl un tymor yng Nghynghrair y Gogledd.
Treffynnon oedd pencampwyr Cynghrair y Gogledd 2023/24, ond gan iddyn nhw fethu â sicrhau trwydded i esgyn, mae’r Fflint, orffennodd yn 2il, wedi esgyn yn eu lle.
Bydd hi’n ddifyr gweld sut bydd Met Caerdydd yn perfformio eleni ar ôl ffarwelio gydag Emlyn Lewis a Kyle McCarthy dros yr haf, dau amddiffynnwr sydd wedi bod yn allweddol i’r clwb ers eu dyrchafiad yn 2016.
Sgoriodd Lewis Rees yn y ddwy gêm yn erbyn Y Fflint yn nhymor 2022/23 wrth i’r myfyrwyr ennill 1-0 ym mis Medi cyn cael gêm gyfartal 1-1 ar Gae-y-Castell ym mis Rhagfyr.
Collodd Y Fflint o 5-1 yn erbyn Y Seintiau Newydd yng Nghwpan Nathaniel MG y penwythnos diwethaf, ac roedd angen gôl hwyr gan Lewis Rees i sicrhau buddugoliaeth o 3-2 i Met Caerdydd oddi cartref yn erbyn Llanilltud Fawr.
Dydd Sul, 11 Awst
Cei Connah v Hwlffordd | Dydd Sul – 14:30
Roedd hi’n haf rhwystredig i Gei Connah a gollodd yn yr amser ychwanegol yn rownd ragbrofol gyntaf Cyngres UEFA yn erbyn NK Bravo o Slofenia.
Mae’r Nomadiaid wedi colli sawl chwaraewr dylanwadol dros yr haf, yn cynnwys eu prif sgoriwr Jordan Davies, y golwr Andy Firth a’r profiadol Michael Wilde.
Mae Hwlffordd hefyd wedi colli un o’u prif sêr wrth i Kai Whitmore adael Dôl y Bont i ymuno â Chasnewydd yn Adran Dau.
Ond mae Ben Ahmun a Kyle McCarthy wedi ymuno â’r Adar Gleision, fydd yn benderfynol o gyrraedd y Chwech Uchaf ar ôl dod mor agos y tymor diwethaf.
Mae Hwlffordd wedi ennill dwy o’u tair gêm flaenorol yn erbyn Cei Connah felly bydd tîm Tony Pennock yn teimlo’n hyderus cyn eu taith i’r gogledd ddwyrain ddydd Sul.
Mae Cei Connah a Hwlffordd wedi camu ymlaen i drydedd rownd Cwpan Nathaniel MG ar ôl buddugoliaethau cyfforddus y penwythnos diwethaf (Bwcle 0-3 Cei Connah, Caerfyrddin 0-5 Hwlffordd).
Llansawel v Pen-y-bont | Dydd Sul – 17:10 (S4C)
Mae Llansawel wedi esgyn i’r uwch gynghrair ar ôl cipio pencampwriaeth Cynghrair y De 2023/24.
Bydd yna bwysau ar y blaenwr profiadol Luke Bowen i arwain y tîm eleni, er nad yw wedi chwarae’n yr uwch gynghrair ers pum mlynedd bellach.
Bydd Pen-y-bont yn siomedig o fod wedi methu a chyrraedd Ewrop ar ôl colli’n rownd derfynol y gemau ail gyfle yn erbyn Caernarfon y tymor diwethaf.
Dychwelyd i’r Chwech Uchaf fydd y nod cyntaf i Ben-y-bont eleni, tra bydd Llansawel yn gobeithio osgoi’r cwymp yn eu tymor cyntaf ers eu dyrchafiad.
Fe wnaeth y timau gyfarfod y penwythnos diwethaf yn ail rownd Cwpan Nathaniel MG a Pen-y-bont oedd yn fuddugol, yn ennill 3-0 oddi cartref er chwarae hanner y gêm ddyn yn brin ar ôl i’r cefnwr Mael Davies gael ei hel o’r maes ar ddechrau’r ail hanner.
Bydd uchafbwyntiau’r gemau ar gael ar wefannau cymdeithasol Sgorio a’r gorau o gyffro’r penwythnos ar S4C nos Lun.
