Yn dilyn penwythnos allweddol ger y copa yn Uwch Gynghrair Cymru bydd y Seintiau Newydd yn awyddus i agor bwlch ar y brig unwaith yn rhagor, tra bydd y ddau isaf yn brwydro ar Gae-y-Castell nos Fawrth.
Nos Fawrth, 15 Rhagfyr
Aberystwyth v Caernarfon | Nos Fawrth – 19:45
Mae Aberystwyth wedi colli eu pedair gêm ddiwethaf ac yn stryffaglu tua’r gwaelodion ar ôl ennill dim ond dwy o’u 14 gêm y tymor hwn.
Yn dilyn colled drom yn erbyn Pen-y-bont rhyw 10 diwrnod yn ôl, mae Caernarfon wedi ymateb yn gadarn gan ennill dwy gêm yn olynol a dringo ‘nôl i’r Chwech Uchaf.
Dyw Aberystwyth heb ennill gartref yn erbyn Caernarfon ers 2008, ond bydd angen i dîm Gavin Allen ddechrau codi pwyntiau’n sydyn os am osgoi llithro i’r ddau isaf.
Record cynghrair diweddar:
Aberystwyth: ➖❌❌❌❌
Caernarfon: ❌➖❌✅✅
Pen-y-bont v Met Caerdydd | Nos Fawrth – 19:45 (yn fyw arlein)
Ar ôl chwalu Caernarfon 6-0 yn eu gêm ddiwethaf bydd Pen-y-bont yn awyddus am driphwynt arall i atgyfnerthu eu lle yn yr hanner uchaf.
Dyw tîm Rhys Griffiths ond wedi colli yn erbyn y tri uchaf y tymor hwn (YSN, Cei Connah, Y Bala) a gyda sawl gêm wrth gefn mae Pen-y-bont mewn safle cryf i sicrhau lle yn y Chwech Uchaf.
Met Caerdydd sydd â’r record sgorio salaf yn y gynghrair y tymor yma (13 gôl mewn 15 gêm), ond byddai buddugoliaeth nos Fawrth yn eu codi uwchben Pen-y-bont.
Ar ôl methu ac ennill dim un o’u naw gêm gyntaf yn erbyn Met Caerdydd, mae Pen-y-bont wedi ennill eu dwy ddiwethaf yn erbyn y myfyrwyr heb ildio gôl.
Record cynghrair diweddar:
Pen-y-bont: ❌✅❌➖✅
Met Caerdydd: ❌✅✅➖❌
Y Drenewydd v Y Seintiau Newydd | Nos Fawrth – 19:45
Bydd y Seintiau Newydd yn falch o’r cyfle i allu bownsio ‘nôl yn syth ar ôl colli dros y penwythnos am y tro cyntaf y tymor yma, ac hynny yn erbyn eu gelynion pennaf Cei Connah (2-0).
Honno oedd colled gyntaf y Seintiau yn y gynghrair ers mis Chwefror – y golled honno hefyd oddi cartref yn erbyn Cei Connah.
Ar ôl pythefnos heb chwarae, mae’r Drenewydd yn eistedd yn y 9fed safle, dim ond un pwynt oddi ar waelod y tabl.
Dyw’r Robiniaid heb ennill dim un o’u 11 gêm gartref ddiwethaf yn erbyn Y Seintiau Newydd, ers ennill 1-0 ar Barc Latham ar ddydd San Steffan yn 2013.
Record cynghrair diweddar:
Y Drenewydd: ❌✅➖❌❌
Y Seintiau Newydd: ✅✅✅✅❌
Y Fflint v Derwyddon Cefn | Nos Fawrth – 19:45
Gohirwyd gêm Y Fflint yn erbyn Pen-y-bont dros y penwythnos, felly mae Neil Gibson wedi gorfod disgwyl yn amyneddgar am ei gêm gyntaf fel rheolwr newydd y clwb, ac am gêm fydd hi rhwng y ddau sy’n hafal ar bwyntiau yn safleoedd y cwymp.
Mae’r Fflint wedi syrthio i waelod y tabl ar ôl colli 11 o’u 14 gêm gynghrair y tymor yma ond bydd Neil Gibson yn hyderus y gallai arwain y tîm allan o safleoedd y cwymp gan fod ganddo berthynas dda gyda rhan helaeth o’r garfan ers ei gyfnod gyda Phrestatyn a Chei Connah.
Bydd y gwynt yn hwyliau’r Derwyddon yn dilyn eu buddugoliaeth swmpus o 4-1 gartref yn erbyn Hwlffordd ddydd Sadwrn, eu buddugoliaeth gynghrair gyntaf ar y Graig yn 2020.
Y Fflint enillodd y gêm gyfatebol gyda Richie Foulkes a Mark Cadwallader yn sgorio ar y Graig ym mis Medi (Cefn 1-2 Fflint).
Record cynghrair diweddar:
Y Fflint: ❌✅❌❌❌
Derwyddon Cefn: ➖❌➖❌✅
Nos Fercher, 16 Rhagfyr
Hwlffordd v Y Barri | Nos Fercher – 19:45
Gyda dim ond un buddugoliaeth yn eu wyth gêm ddiwethaf tydi lle’r Barri yn y Chwech Uchaf yn sicr ddim yn ddiogel.
Ar ôl colli’n drwm yn erbyn y Derwyddon ddydd Sadwrn bydd Wayne Jones yn disgwyl ymateb gan ei chwaraewyr nos Fercher.
Dyw’r Barri heb ennill yn Nôl-y-Bont ers eu buddugoliaeth wedi amser ychwanegol yn ail rownd Cwpan Cymru ‘nôl yn 2011.
Ionawr 2003 oedd y tro diwethaf i’r Barri ennill gêm gynghrair oddi cartref yn erbyn Hwlffordd.
Record cynghrair diweddar:
Hwlffordd: ❌✅✅➖❌
Y Barri: ❌➖❌✅❌
