S4C

Navigation

Ras am yr Esgid Aur

Mae’r ras am yr Esgid Aur yn gwbl agored eleni gyda dim ond dwy gôl yn gwahanu naw chwaraewr.

Rhys Hughes Cei Connah 10
Louis Lloyd Caernarfon 10
Ben Ahmun Hwlffordd 9
Ollie Hulbert Y Barri 9
Aramide Oteh Y Seintiau Newydd 9
Chris Venables Pen-y-bont 8
Aaron Williams Y Drenewydd 8
Zack Clarke Y Seintiau Newydd 8
Jordan Williams Y Seintiau Newydd 8

 

Rhys Hughes o Gei Connah yw un o’r prif sgorwyr, a gyda’r Nomadiaid yn cystadlu’n y Chwech Isaf, bydd y chwaraewr canol cae ymosodol yn ffyddiog o allu parhau i serennu yn ail ran y tymor.

Wedi dweud hynny, mae Cei Connah wedi mynd ar rediad o bedair gêm gynghrair heb ennill am y tro cyntaf ers dros 11 mlynedd, felly bydd angen i Hughes ysgogi’r garfan gyda’i goliau os yw’r Nomadiaid am gystadlu am y 7fed safle.

Louis Lloyd o Gaernarfon sy’n gydradd brif sgoriwr ar y funud, ond mae gemau caled o flaen y Cofis yn ail ran y tymor a bydd hi’n her i’r gŵr 21 mlwydd oed ganfod y rhwyd yn erbyn yr elît.

Mae pedair o goliau Lloyd wedi dod o’r smotyn, ond ar ôl methu cic o’r smotyn yn ei gêm ddiwethaf yn erbyn Y Fflint tybed a fydd yr asgellwr wedi colli ei hawl i gymryd cyfrifoldeb dros y ciciau.

Mae Ben Ahmun yn mwynhau ei hun ers ymuno â Hwlffordd dros yr haf gyda naw gôl y tymor hwn a pedair o rheiny wedi dod ym mis Ionawr, felly mae’r momentwm yn sicr gan yr ymosodwr tal.

Bydd Ollie Hulbert yn un i’w wylio yn ail ran y tymor gan iddo ddechrau’r ymgyrch ar dân cyn dioddef anaf, ond ar ôl rhwydo’i gôl gyntaf ers mis Medi yn erbyn Aberystwyth dros y penwythnos bydd blaenwr Y Barri yn bendant yn arf peryglus yn y Chwech Isaf.

Un arall sydd wedi disgleirio yw blaenwr Y Seintiau Newydd, Aradime Oteh sydd wedi sgorio naw gôl ers ymuno â’r pencampwyr o Walsall dros yr haf, er iddo ddechrau dim ond naw gêm gynghrair yn rhan gynta’r tymor.

Bydd gan Oteh fwy o gystadleuaeth am ei le yn nhîm y Seintiau yn ail ran y tymor gan i Zack Clarke ymuno â’r pencampwyr o Gaernarfon ar ôl taro wyth gôl i’r Cofis yn rhan gynta’r tymor.

Yn ogystal ag Oteh a Clarke, mae Jordan Williams yn chwaraewr sydd yn dueddol o fynd o dan y radar yng Nghroesoswallt er iddo gyfrannu’n gyson o’r esgyll, ac mae wedi rhwydo wyth gôl unwaith eto eleni.

Mae ymosodwr Y Drenewydd, Aaron Williams ymysg y prif sgorwyr unwaith eto’r tymor hwn, ac ar ôl taro 16, 17 ac 19 o goliau yn ei dri tymor diwethaf, mae’n sicr yn fygythiad yn y frwydr am yr Esgid Aur, er bod y Robiniaid mewn safle siomedig.

A peidiwch a di-ystyru y pen profiadol, Chris Venables, sydd wedi ennill yr Esgid Aur ar bump achlysur yn y gorffennol gyda’r diweddaraf yn dod yn 2020/21.

Mae Venables yn drydydd ar restr prif sgorwyr holl hanes y gynghrair gyda 243 o goliau mewn 569 ymddangosiad, ac er ei fod yn 39 mlwydd oed erbyn hyn mae’n dal i brofi ei werth i Ben-y-bont sy’n brwydro am y bencampwriaeth.

Brad Young oedd enillydd yr Esgid Aur y tymor diwethaf, yn rhwydo 22 o goliau i’r Seintiau Newydd yn symud i Sawdi Arabia dros yr haf.

Cyn hynny, roedd Declan McManus wedi hawlio’r tlws am ddwy flynedd yn olynol, ond dim ond pedair gôl sydd gan yr Albanwr i’w enw y tymor hwn.

Does dim un chwaraewr o un o glybiau’r de wedi ennill yr Esgid Aur ers i Rhys Griffiths gipio’r tlws am y 7fed tymor yn olynol yn 2011/12 tra roedd gyda Llanelli.

19 o goliau oedd cyfanswm Griffiths yn 2011/12, sef y swm isaf gan enillydd yr Esgid Aur yn holl hanes y gynghrair, ond efallai bydd swm llai na hynny yn ddigon i gipio’r wobr y tymor hwn.

Rhys Llwyd

Author Rhys Llwyd

More posts by Rhys Llwyd
Methu dod o hyd i'r hyn oeddech chi'n chwilio amdano?