Mae rhan gynta’r tymor wedi dod i ben felly dyma gyfle i edrych ar bwy sydd wedi dod i’r brig o ran siartiau’r ystadegau.
PRIF SGORWYR
Dau chwaraewr ifanc sy’n arwain y ffordd gyda 10 gôl yr un sef Rhys Hughes o Gei Connah a Louis Lloyd o Gaernarfon.
Ar ôl arwyddo i Gei Connah o Tranmere dros yr haf, mae Rhys Hughes yn sicr wedi dal y llygad gyda 10 gôl, ac mae’r gŵr 23 mlwydd oed wedi creu tair gôl hefyd sy’n ei roi ymhlith y chwaraewyr sydd wedi cyfrannu’r nifer fwyaf o goliau y tymor hwn.
Mae Louis Lloyd wedi dechrau’r tymor yn gryf a bydd y Cofi Army yn cofio ei gôl fuddugol oddi cartref yn erbyn Y Seintiau Newydd am flynyddoedd i ddod.
Mae pedair o goliau Lloyd wedi dod o’r smotyn, ac mae eto i greu gôl y tymor hwn, ond yn sicr mae mwy i ddod gan yr asgellwr 21 mlwydd oed.
Un arall sydd wedi disgleirio yw blaenwr Y Seintiau Newydd, Aradime Oteh sydd wedi sgorio naw gôl ers ymuno â’r pencampwyr o Walsall dros yr haf, er iddo ddechrau dim ond naw gêm gynghrair yn rhan gynta’r tymor.
Rhestr Fer
RHYS HUGHES CEI CONNAH 10
LOUIS LLOYD CAERNARFON 10
ARAMIDE JAY OTEH Y SEINTIAU NEWYDD 9
BEN AHMUN HWLFFORDD 8
ZACK CLARKE CAERNARFON 8
OLLIE HULBERT Y BARRI 8
JORDAN WILLIAMS Y SEINTIAU NEWYDD 8
Y CREUWYR
Mae un chwaraewr ymhell ar y blaen ar restr y creuwyr a Zeli Ismail o’r Drenewydd yw hwnnw, sydd wedi creu 13 o goliau i’r Robiniaid hyd yma.
Daeth 12 o’r 13 ‘assist’ rheiny cyn diwedd mis Hydref, ac felly bydd angen i Ismail ail-ddarganfod ei safon blaenorol os am helpu’r Drenewydd i osgoi’r cwymp eleni.
James Crole o Ben-y-bont a Jake Phillips o’r Fflint sydd nesaf ar y rhestr gyda’r ddau wedi creu saith gôl yr un yn rhan gynta’r tymor.
Rhestr Fer
ZELI ISMAIL Y DRENEWYDD 13
JAMES CROLE PEN-Y-BONT 7
JAKE PHILLIPS Y FFLINT 7
NATHAN WOOD PEN-Y-BONT 6
OSEBI ABADAKI Y BALA 6
BEN CLARK Y SEINTIAU NEWYDD 6
LLECHEN LÂN
Zac Jones o Hwlffordd sy’n arwain y ras am y Faneg Aur gan i’r golwr 24 oed o Seland Newydd gadw 12 llechen lân mewn 22 gêm yn rhan gynta’r tymor gan godi’r clwb i’r Chwech Uchaf am y tro cyntaf yng nghyfnod y 12-Disglair.
Joel Torrance o’r Bala sy’n ail ar y rhestr ar ôl cadw 10 llechen lân hyd yma, sy’n cynnwys pum gêm ddi-sgôr yn rhan gynta’r tymor.
Rhestr Fer
ZAC JONES HWLFFORDD 12
JOEL TORRANCE Y BALA 10
ADAM PRZYBEK PEN-Y-BONT 9
GEORGE RATCLIFFE CEI CONNAH 6
CONNOR ROBERTS Y SEINTIAU NEWYDD 6
CYFRANIAD GOLIAU
Gyda 14 cyfraniad gôl mae James Crole o Ben-y-bont ar frig y rhestr, yn hafal gyda Zeli Ismail sydd hefyd ar y copa ar ôl creu cymaint o goliau.
Mae James Crole, 20 oed, wedi sgorio a chreu saith gôl i Ben-y-bont y tymor hwn ac wedi bod yn allweddol yn eu llwyddiant eleni.
Mae Zack Clarke hefyd ymysg yr enwau ar frig y rhestr sy’n profi pam fod Y Seintiau Newydd wedi bod mor awyddus i’w ddenu o Gaernarfon i Groesoswallt.
Bydd Y Fflint yn sicr yn gweld colli’r ymosodwr Florian Yonsian sydd wedi gadael Cae-y-Castell ym mis Ionawr ond sydd eto i arwyddo â chlwb newydd.
Enw | Clwb | Goliau | Creu | Cyfraniad Goliau |
James Crole | PEN | 7 | 7 | 14 |
Zeli Ismail | DRE | 1 | 13 | 14 |
Rhys Hughes | CEI | 10 | 3 | 13 |
Aramide Oteh | YSN | 9 | 4 | 13 |
Jordan Williams | YSN | 8 | 4 | 12 |
Florian Yonsian | FFL | 7 | 5 | 12 |
Zack Clarke | YSN | 8 | 3 | 11 |
Ben Ahmun | HWL | 8 | 3 | 11 |
Ben Clark | YSN | 5 | 6 | 11 |
Louis Lloyd | CFON | 10 | 0 | 10 |
Ollie Hulbert | BARR | 8 | 2 | 10 |
Ryan Reynolds | MET | 6 | 4 | 10 |
Sion Bradley | YSN | 6 | 4 | 10 |
Nathan Wood | PEN | 4 | 6 | 10 |